28 abril 2015

O PSOE destaca a importancia do deporte para a loita contra a exclusión social e promete máis apoio cos clubes locais

Martín Seco subliña os éxitos das entidades arteixanas a base de esforzo e dedicación a pesar da pouca colaboración do goberno de Calvelo



O PSOE destaca no seu programa a importancia que ten o deporte no día a día dos cidadáns, xa que a práctica de exercicio físico é cada vez máis común entre os nosos veciños. Por iso, membros da candidatura socialista, coa cabeza de lista á fronte, Martín Seco, reuníronse en datas recentes con representantes de clubs deportivos para coñecer de preto as súas necesidades.

Un deses encontros celebrouse co club de balonmán de Arteixo. O PSOE transmitiu entón a súa vontade de desenvolver o deporte como medida para loitar contra a exclusión social, xa que Martín Seco considera que se pode apostar dunha maneira transversal, desde o departamento de Servizos Sociais, polo traballo cos clubs deportivos como proceso inclusivo para colectivos en risco.

Os socialistas puxeron como exemplo o traballo da entidade para explicar como se pode empezar a traballar desde abaixo para lograr, con esforzo, a consecución de éxitos deportivos. Así, o PSOE valora o seu labor e adquiriu o compromiso de seguir apoiando e colaborando con eles.

Outra das reunións foi co club de natación, que conseguiu igualmente numerosos logros deportivos. Por iso é polo que Martín Seco subliñou a importancia de apoiarlles pondo á súa disposición as instalacións municipais para o desenvolvemento do seu traballo.

Neste sentido, o PSOE lamenta que o goberno do PP co señor Calvelo non fose capaz de escoitar aos clubs de natación e salvamento para aproveitar ese investimento de preto de catro millóns de euros en construír unha piscina de 50 metros cunhas bancadas adaptadas para a celebración de grandes eventos, á vez que criticaron que nin sequera se construíron máis rúas para nadar.

Por último, o equipo de Martín Seco desprazouse a Larín para falar co seu club deportivo, para o que se comprometen a establecer un novo convenio que permita a construción dun campo de fútbol dotado con herba artificial. Así mesmo, o PSOE potenciará as súas escolas deportivas coa posta en marcha dun servizo de transporte desde o núcleo de Arteixo e outras parroquias para facilitar o desenvolvemento da súa actividade.

A candidatura socialista destacou que o CD Larín conta con dispoñibilidade de terreo para pór en práctica este ilusionante proxecto baixo a dirección do presidente Veo, polo que consideran que se pode pensar nunha escola deportiva de maior calado nunhas instalacións renovadas para este club.


No hay comentarios :

Publicar un comentario

¡Animamoste a comentar! Se deixas algunha forma de contactar contigo, poderemos responder.